Ака уйăхĕн 23-мĕшĕнче Хирти Пикшикри вăтам шкулта чăваш чĕлхипе литература эрни пуçланчĕ. Кăçал эрнене Аслă Вĕрентекенĕмĕр, чăваш халăхне çутта кăлараканăмăр Иван Яковлевич Яковлев çуралнăранпа 170 çул çитнине халаланă. Чăваш чĕлхипе литература эрнин тĕп тĕллевĕ – ачасене чĕлхе туйăмне ӳстересси, пултарулăхне класс тулашĕнчи ĕçсенче аталантарасси, тăван чĕлхене юратма вĕрентесси. Савăнăçлă линейкăра шкулти чăваш чĕлхипе литературăна вĕрентекен Пестрова Ирина Ивановна эрне планĕпе паллаштарчĕ. 5-7 класра вĕренекенсем тăван çĕр-шыв, тăван чĕлхе çинчен чăвашла, вырăсла тата тутарла сăвăсем вуласа Чăваш республикинче тĕрлĕ халăх туслă пурăннине кăтартса пачĕç.